Mogall Firgozkaramno,
“Adeus korcho vellu paulo,
Ai mhojem kalliz re fapsota.”
Ho manddo hanvem ani tumi zaite pavtt dusreank mhonnla astolo. Atam mhakach ho aikunk kalliz zhodd zata ani dolle dukhanim bhortat.
Sat (7) vorsam hanga Aquem St. Sebastiao firgojent umedin sarlea uprant atam hangasorlo bhair sortanam fokt donuch vostu mhonntam. Poilem mhollear, “Devak argham”.
Hanga sat lamb vorsam khoincheanuch sodd-soddit sorun ghelim. Devachea adharan sodanch bori bolaiki meuli. Sevadhormik, somajik ani arthik vavr korunk umed kednanch unnem zaunk nam. Goroz tea vellar, goroz tea mon’xancho adhar ani sohokar meulo. Zaitea borea monachea firgozkaramnim fuddem sorun zaito tenko dilo. Soglleanchi apurbai dista.
Dusre suvater “Dev borem korum” mhonntam:
- Parish Pastoral Council-ak.
Hanv ghoddie ghorantlo vo Igorjentlo chodd bhair bonvunk pavunk nam. Punn dor ek PPC vangddian mhoje hat, paim ani dolle zaun mhojea vavrant ani zobabdarent vantto ghetlo ani mhozo vavracho bhar unnem kelo. Sat vorsam fattim poileach disa thaun tem aiz bhair sorchea vellar legun mhojeam buzam voilo bhar soglleanim apleacher ghetlo. Tanche borobor vavr korunk sodanch umed zali. Parish-int vhoir sokla zalam tednam sodanch mhaka tannim rakhlo.
- Cofre Committee-k
PPC vangddianim tor Gonvllik (pastoral) vavr kelo, zalear Cofre Committee-in igorjechi dhan-dovlot samballunk bharim vavr kelo. Zaite pavtt aplo jiv ani nanv legun risk-ar ghatlo. Kitle pavtt Civil ani Criminal Court-ant ube ravchem poddlem. Kitle pavtt Police-achea darar marchem poddlem. Baddeamkaram (tenants) lagim bore baxen sanglear somzonam zalear kitlim sogott zogddim korchim poddlim. Itlem asunuim punn Cofre Committee-in nettan fuddem sorun odik grestkai vaddoili ani asli ti samballun dovorlea. Mhaka tin (3) Cofre Committee meuleo. Dor pavtti tantunt fokt mhaka dhorun 5 vangddi astale. Vangddi itle komi asun itlo vhodd vavr kelo mhonn tankam Dev borem korum mhonntam.
- Dev-Sondexkaram (Catechists)
Zaitim zannam tim. Tancheanim bhurgeancho ani vaddloleancho bhavart samballunk ani vaddounk dor aitara ani aitara bhair vavr kelo. Fuddle Igorjeche bhavartache okhond khambe toiar korpant adhar dilo. Devan tancher axirvad ghalum.
- Society of St. Vinvent de Paul (S.S.V.P.)
Tornatti pirai, Sundoraia ani grestkai asta thoim sogllim sompe ponnim zoma zatat. Punn mhatar-pirai, durbollkai ani pidda asta thoim konn dixtti poddonam. Oslea vellar ani osle suvater durbollancho usko ani pekovnni diunk SSVP vangddeanim Igorjecho vavr kelo. Tankam Dev axirvadanim bhorum.
- Legiao Marie ani Divine Mercy Group
Konn tori poixeancho ani vostuncho adhar dita, zalear thoddim aplea magnneacho adhar ditat. Magnnea vorvim vhodd-vhodd vostu xarti pavleo.
- Office-ant, Igorjent ani bhailean vavurpi ani jevonn-khann toiar korpi
Ekleachean sogllo vavr korunk zainam. Dusreancho adhar gheun, mhojea hata-khal asloleo soglleo vostu bore baxen samballunk mhaka zaiteancho personal adhar meulo. Tea pasot office-ant Claty, Kitchen-ant Mary, Igorjent Franciska, Augusta ani Xavier hannim sodanch aplem thondd bond korun hatinim koxtti vavr kelo. Dev tancher soglleancher axirvad ghalum.
- Pormoll & Extra Ordinary Eucharistic ministers
Ekleanim Jezuchi kudd ani rogot vanttlem ani dusreanim Igorjechi mahiti ani Deva utor vanttlem. Tanchea vavrak zaito foll mellum.
- Personal Friends & well-wishers
Hanv nanv konnachem gheinam, punn zaitea zannamnim mhoji khub apurbai keli. Aploch koso mhozo usko kelo. Aplea ghora lagim jevta-khata tednam legun mhozo ugddas kelo. Anik zaiteam lagim mhoje sovem ho usko aslo punn zaiteam karannank lagun dakhounk ghoddunk nam. Tankam soglleank hanv kallzant thaun Dev borem korum mhonntam.
- Mhojean soglleo vostu ekttean korunk kednanch zaunchem naslem. Tea pasot mhoje borobor adle Padr Kur Fr. Gregory D’Cruz haka chodd ani chodd Dev borem korum mhonntam. Tea uprant Fr. Mouvin Menezes hankam ek voros mhoje borobor vavr keloleak argham ditam. Ani xevottak soglleam von chodd vorsam borobor ravun Igorjent vavurlo ani personally adhar dilo mhonn Fr. Leslie Gomes hankam Dev borem korum mhonntam.
Hanv ek Superman nhoi aslom. Punn tumche baxen osoktaieo aslolo Padri-monis. Mhoje lagim zata titlem hanvem korunk zaito proitn kelo. Sogllem ghoddie xevottak pavunk nam zait. Punn xevottak pavlam tantunt hanv khuxalkai bhogtam. Tumkam ghoddie zai te baxen zalam vo zaunk nam tem tumich polloun gheunchem. Mhaka lagun firgojent borem zalam zalear Devak argham diat. Borem zaunk nam zalear mhaka mafi korat mhonn magtam.
Hanga he St. Sebastiao Igorjent Fr. Agnelo Rodrigues, Padr Vigar mhonn ani Fr. Josely Rocha, Padr Kur mhonn etele tankam maie-mogacho ieukar mhonntam.
Atam hanv dhadoskaien hanga sorlo bhair sortanam itlench mhonnttam, “Our paths may change, but the memories we share will remain in my heart forever.”
Tumcho adlo Padr Vigar,
Fr. Andrew Pereira